Прычынай сталі няспынныя гібрыдныя атакі з тэрыторыі Беларусі кантрабандысцкімі балёнамі, якія парушаюць працу Віленскага аэрапорту і пагражаюць бясьпецы цывільнай авіяцыі, а таксама блякаваньне літоўскіх грузавікоў з прычэпамі, якім улады Беларусі не дазваляюць вярнуцца назад у Літву, вынікае з паведамленьня МЗС Літвы.
Літва запатрабавала, каб Беларусь:
- выконвала свае міжнародныя абавязаньні,
- забясьпечыла кантроль над сваёй паветранай прасторай і мяжой, каб спыніць там правапарушэньні,
- прыняла меры для спыненьня міжнародных арганізаваных злачынстваў.
МЗС Літвы папярэдзіў, што калі ўлады Беларусі ня спыняць эканамічны шантаж і ня вернуць незаконна сканфіскаваную маёмасьць, якая належыць грамадзянам і кампаніям Эўразьвязу, Літва паведаміць міжнародным арганізацыям пра рызыкі і пагрозы для міжнародных грузаперавозак у Беларусі.
Літоўскі бок заявіў, што пакідае за сабой права ўключыць юрыдычныя мэханізмы для прыцягненьня беларускай дзяржавы да адказнасьці і спагнаньня кампэнсацыі за прычыненую шкоду, а таксама прыняць іншыя контразахады на нацыянальным, эўрапейскім і міжнародным узроўнях.
А 19:36 у гэты ж дзень Віленскі аэрапорт чарговы раз спыніў прыём і адпраўку рэйсаў праз пагрозу сутыкненьня самалётаў з кантрабандысцкімі балёнамі, запушчанымі зь Беларусі.
Ад пачатку году ў паветраную прастору краіны ўляцела больш як 600 балёнаў з кантрабандай і амаль 200 дронаў.
Пасьля аднаўленьня працы памежных пераходаў ужо шэсьць разоў прыпынялася праца аэрапорту ў Вільні з прычыны новых мэтэазондаў, якія ўрываліся ў паветраную прастору краіны з тэрыторыі Беларусі.
Форум