Амэрыканска-эўрапейскае палітычнае выданьне Politico выпусьціла на нямецкай мове падкаст пра Аляксандра Лукашэнку «Machthaber: Alexander Lukaschenko» (Валадар: Аляксандар Лукашэнка).
Аўтар падкасту — Гордан Рэпінскі, нямецкі журналіст, адказны рэдактар выданьня Politico Germany.
Паводле Politico, праект Machthaber прысьвечаны самым уплывовым і супярэчлівым палітыкам сучаснасьці. Раней былі падкасты пра Ўладзіміра Пуціна, Джорджу Мэлёні, Уладзіміра Зяленскага, Біньяміна Нэтаньягу, Мары лё Пэн ды іншых кіраўнікоў і ўплывовых палітыкаў як дэмакратычных, так і аўтарытарных і дыктатарскіх краін.
У падкасьце пра Лукашэнку аналізуецца, як ён трымае ўладу ў Беларусі дзесяцігодзьдзямі, якое месца яго рэжыму ў міжнародным кантэксьце: адносіны з Расеяй, Захадам, санкцыі, які наступствы яго кіраваньня для грамадзянскай супольнасці і свабодаў у Беларусі, зь якімі выклікамі сутыкаецца рэжым — як унутранымі, так і вонкавымі.
ГЛЯДЗІЦЕ ТАКСАМА: Лукашэнка ў футарале. Як улады прасоўваюць прапагандысцкую кнігу і колькі яна каштуе дзяржаве